Wasiirka Maaliya Xukuumada Fidraalka Soomaaliya Cabdiraxmaan Ducaale Bayle ayaa Maanso ku Cabiray Halka ay Marayaan Arimaha Dayn Cafinta Soomaaliya.
Qoraal uu Wasiirka kusoo Daabacay Saaka Bartiisa Facebook ayuu Kuyiri:-
“Waan idin salaamay dadweynaha Soomaaliyeed ee sharafta iga mudonoow. Waa khamiis kale iyo khayrkeeda. Waxa aan idiin soo gudbinayaa maanso kale oo iskugu dhafan Gabay iyo hees jiifto ah. Waxa caawa ay xusaysaa arrinta deyn cafinta oo maanta ka soo gebegebowday Hay’adda lacagta adduunka, IMF. Taariikh cusub oo yididdiilo badan ayaa dalkeenna u bilaabantay. Ilaah baa Mahadsa iska le.
Ku soo dhawaada:
Gabaygii iyo heestii
Geedka geedaha u mudan iyo
Maantaba Gobbaan nahay
Hordhac Gabay
Dadaalkaan ku jirey een wax badan
Debinta ruugaayey
Dood qaran wixii aan furfuray een hadal ku deeqsiiyey
Wixii aan damqaday een xanuun diifta lediwaayey
Dareenkaygu wuxu sare u kacay een ilmada daadshay
Danta guud wixii an is idhi yaanay kala daadan
Da’da soo kacaysiyo waxan daa’imada fiirshay
Dulmigiyo xasraddiyo waxaan daaya idhi ceebta
Halasaha wixii aan ka digay dogobka qiiqaamay
Duuduub ku qaado iyo waxaan foolxumada diiday
Dagaal dheer wixii aan lagalay daallinkiyo tuugga
Dugaag iyo wixii an hanfade Dacar waraabsiiyey
Waxan hawlo daayacan arkay een dabaqyo saarsaaray
Dabayshiyo wixii uu hanfigu doorshay midabkayga
Dulqaadkayga wixii irkay een
Dayrka sare eegay
Dembbi waxan ka dheeraaday een diinta maganaystay
Dixdii oo biyale waanigaa maanta soo degey e
Deyntii hadday naga baxday oon daahir nahay caawa
Darartaan filaynniyo hadduu roobki noo da’ay e
Dalka oo dhisma iyo waxa ku xigi doobi buuxsamaye
Daf waxaynna soo yidhi nabsigii diinku soo sidaye
Dantuna waxay faraysaa inaan dalagga beernnaaye
U diyaargroobay wakhtigu waa is dabayaalle
Heestii
Googgaa dadweynoow
Wax dhanbaynnu guuraha
Iyo galab carrowgeenna
Nafta biima gelinnee
Geeddiga innoo fura
Gurgurkiyo aloolkiisiyo
Surradahana ka la gura
Caawaan godlanayaayoo
Gabay inan tirabiyo
Geerarku furayahayoo
Murti igu gulaalnnayd iyo
Gaax layga filayaa e
Gallad eebbe weeyaane
Wilwilaha an goynnee
Dhinaca iga soo gala
Hadduu geelu noo dhalayoo
Gibilkii na saarnnaaiyo
Wixii daymo nagu go’ay
Giddi laysla meel dhigay oo
Gacansaarnna lagu daray
Gundhigeedu wuxu yahay
Gellin dhexe habeenkii
Waxan galangalceeyaba
Hurddadu iga guurtoo
Gogosha isdagaalnnaba
Hadbba gorofka noo tolan
Gunta laga dalooshaba
Gefka waxan dulqaatoo
Iska gibil adeygoo
Miciyaa isgelisaba
Gofanaha ilka dheer
Gaagaabka cilinka
Waxan luqunta gooyoo
Gawnaxa u buuraba
Waxan soo gucleeyaba
Guradeeda buurtaan
Halasaha u soo galay
Maantaynnu gaadhnnoo
Laynna soo gelbbinayaa
Geedka geedaha u mudaniyo
Maantaba gobbaan nahay e
Geblo iyo ciyaar tumo
Warkana dunida gaadhsii
Waxay geeri iyo nolol
Nafta hadimo galisaba
Galoolkiyo jillowdiisa
Amma geedagaallaha
Dantu waxay u geysoo
Gasiin waxay ka dhigataba
Gaajada ku mirataba
Shirkii ay galeen saaka
Gabagabada dooddii
Guulbaa ka dhalatoo
Talo waxay guddoonsheen
Laguna soo gunaanaday
In ay noo garaabaan
Geesiyaal inaan nahay
Waxa ay gorfaystaan
Garabsaar horow soco
Hawshooda gudan kara
Hadduu geelo noo dhalayoo
Gibilkii na saarnnaaiyo
Wixii daymo nagu go’ay
Giddi laysla meel dhigay oo
Gacansaarnna lagu darayoo
Geedka geedaha u madaniyo
Allaylehe gobbaan nahay
