NEW YORK – Sarkaal ka tirsan Qaramada Midoobay ayaa Isniintii iftiimiyay khataraha argagixisada ee joogtada ah iyo baahiyaha bini’aadantinimo ee ba’an ee ka jira Soomaaliya, isagoo ku booriyay saaxiibada caalamka inay bixiyaan dhaqaale si ay gacan uga geystaan hagaajinta xaaladda halkaas.
James Swan oo ah madaxa howlgalka Qaramada Midoobay ee Soomaaliya ayaa ka sheegay shirka golaha ammaanka ee Qaramada Midoobay in dowladda Soomaaliya ay muhiimad gaar ah siineyso amniga iyo la dagaalanka dagaalyahanada Al-Shabaab oo dhinacyo badan leh.
“Dhankeeda, Al-Shabaab waxa ay weli ka go’an tahay in ay sii waddo weerarrada argagixisanimada iyada oo aan tixgalinayn khasaaraha nolosha rayidka,” ayuu yidhi. “Waxaan cambaareynayaa weerarradan argagixisanimo, waxaana tacsi u dirayaa qoysaska dadkii la dilay.”
Swan, oo sidoo kale ah ku simaha ergeyga gaarka ah ee xoghayaha guud ee Qaramada Midoobay u qaabilsan Soomaaliya, ayaa xubnaha golaha ku wargeliyay in in ka badan 3.8 milyan oo qof oo dalka ku nool ay weli barakac yihiin, isaga oo intaa ku daray in “cimilo aad u xun, amni darro, iyo cudurro dillaacay ay dhammaantood kor u sii kacayaan baahida loo qabo taageero naf-badbaadin ah.”
Isagoo ku nuuxnuuxsaday in caqabadahan lagu xallin karo maalgashi si loo xoojiyo “adkeysiga muddada-dheer” ee bulshooyinka, kaabayaasha, iyo dhaqaalaha, Swan wuxuu ku booriyay la-hawlgalayaasha caalamiga ah inay bixiyaan maalgelin si loo daboolo baahiyaha bani’aadamnimada, sida Baahiyaha Bani’aadamnimada iyo Qorshaha Jawaabta ee 2024, oo u baahan $1.6 bilyan, kaliya 24 boqolkiiba ayaa la maalgeliyay.
“Heerka hadda la joogo, saameynta isbeddelka cimiladu waxay ka badan tahay awooddayada aan ku taageerno la qabsiga iyo wax ka qabashada bini’aadantinimada,” ayuu yidhi.
Swan ayaa sidoo kale ka hadlay xiisada u dhaxeysa Itoobiya iyo Soomaaliya, isagoo ku booriyay labada dowladood inay si nabad ah ku xalliyaan khilaafkooda. “Waxaan ku dhiirigelinayaa Soomaaliya iyo Itoobiya inay arrintan ku xalliyaan si nabad ah iyadoo la raacayo mabaadi’da madax-bannaanida iyo midnimada dhuleed ee ku xusan Axdiga Qaramada Midoobay iyo sharciga caalamiga ah,” ayuu raaciyay.
