Waxaa sii xooggaystay ololaha Doorashada Dowlad-Goboleedka Puntland iyada oo maalinba maalinta ka dambaysa ay sii kordhayaan musharrixiinta isusoo taagaysa qabashada Xilka Madaxweynaha & Ku xigeenkiisa ee Dowlad-Goboleedkaas.
Musharrixiinta kala aragtida duwan ayaa mid weliba waxa uu dhaqdhaqaaq siyaasadeed ka wadaa Magaalada Garoowe xarunta Dowlad-Goboleedka Puntland waxaana waddooyinka lagu dhejiyay sawirrada iyo hal ku dhigga musharrixiinta.
Hoggaanka Sare Amniga ee Guddiga Doorashooyinka Dowlad-Goboleedka Puntland ayaa diyaariyay ciidamo loogu talagalay in ay kahortagaan rabshado ka dhaca Magaalada Garoowe xiliyada ay bannaanbaxyada dhiganayaan musharrixiinta.
Hoteellada & goobaha kala ee ku dhow Madaxtooyada Dowlad-Goboleedka Puntland waxa ka socda kulamo kala duwan oo Habeen & maalin halkaas ka dhacaya si Musharrax weliba uu u sameeyo dhaqdhaqaaqa uu u arko in uu muhiim u yahay.
Dhanka kale waxaa hadal-hayn badan dhaliyay sida uu noqon doonno xaalka Xildhibaannada deegaan-doorashadoodu tahay Deegaannada SSC-Khaatumo maadaama Garaadada dhaqanka & Maamulka KMG ah wadajir u shaaciyeen in ay ka baxeen DG Puntland.
