Wararka naga soo gaaraya Magaaladda Muqdisho, gaar ahaan Suuqa Siinaay ee magaalada Muqdisho, ayaa sheegaya in Rag hubeysan barkhanimadii maanta ay gudaha suuqaasi ku dileen nin Dawaarle ahaa.
Dad goobjoogayaalayaa sheegay laba dhalinyaro ah oo Bastoolado ku hubeysnaa in marka hore ay tageen dukaan yar oo marxuumka la dilay uu ku lahaa gudaha suuqa iyaga oo iska dhigayay dad wax iibsanaya kadibna waxa ay qeybta sare ee jirkiisa kala dhaceen rasaas.
Daqiiqado kadib ayaa ninkii waxaa dhaawac ahaan loogu qaaday isbitaalka, balse inta aanu la gaarsiin ayuu ku geeriyooday wadada, raggii dilka geystay ayaa ka baxsaday goobta, maadaama dantii ay lahaayeen gaareen.
Wararku waxaa ay sheegayaan in sababta loo beegsaday ninkan ay tahay wiil uu dhalay oo ka tirsan saraakiisha ciidanka dowladda federaalka Soomaaliya.
Laamaha ammaanka dowladda federaalka ayaa sidii caadada aheyd tagay goobta mnarkii ay baxsadeen raggii dilka geystay, waxayna halkaasi ka bilaabeen baaritaanada la xiriira dilkan dhacay iyo sidii looga daba tagi lahaa dableyda.
Shalay oo ugu dambeysay waxaa koox hubeysan ay isgoyska Siinaay ee magaalada Muqdisho ku dileen askari ka tirsanaa ciidanka booliska Soomaaliya, kaasi oo dilka kadib laga qaatay qorigii uu watay.
https://flowercompany.ca/hamilton/
