Dowladda Kenya ayaa xaqiijiysay in ay kordheen dadka ku dhintay Weerarkii Al-Shabaab ay ku qaadeen Hoteelka lagu raaxaysto ee DusitD2 oo ku yaalla Galbeed Magaalada Nairobi.
Taliyaha Ciidanka Booliska dalka Kenya Joseph Boinnet ayaa warbaahinta u xaqiijiyay in hadda ay hayaan meydadka 21 qof oo uu ku jiro Askari Boolis ah oo ka tirsanaa Ciidankii loogu tala galay sugitaanka Ammaanka goobta uu weerarku ka dhacay.
“Waxaan dooneynaa in aan xaqiijino in Caawa lix mayd oo kale ayaa laga helay goobtii la weeraray, hal askari oo bilays ah ayaa si lama filaan ah ugu geeriyooday dhaawacyadiisa,”ayuu u sheegay wariyeyaasha Mr Boinett.
Waxaa uu sheegay Ilaa iyo haatan in la la’yahay 19 qof, islamarkaana ay wali waddaan baaritaano.
Taliyaha ayaa xusay in dadka dhintay ay ahaayeen 16 Kenyaan ah, hal British ah, hal Ameerikaana,islamarkaana dhalashada saddexda soo hartay aan weli la xaqiijin.
