Dowlad Goboleedka Jubbaland ayaa bilowday qorshe dib u dejin loogu samaynayo qoysaskii ku barakacay abaarihii ugu dambeeyay iyo fatahaadihii ka dambeeyay. Barnaamijkan waxaa looga golleeyahay in uu taageero lama huraan ah u fidiyo dadka ay sida daran u saameeyeen masiibooyinka dabiiciga ah.
Wasaaradda Xanaanada Xoolaha ee Dowlad Goboleedka Jubbaland ayaa billowday in qoysaskan ay u qeybiso ari, iyadoo aqoonsatay in qaar badan oo ka mid ah ay markii hore ku tiirsanaayeen xoolaha nool, balse ay ku waayeen xoolohooda duruufo adag awgeed. Wasiirka Xannaanada Xoolaha, Maxamed Nuur Cali Nuuraani, ayaa sheegay in dadaalkan uu ku suurta galay in lala kaashado hay’ado samafal oo kala duwan oo ay ka go’an tahay inay gacan ka geystaan hannaanka soo kabashada.
“Waxaan u baahannahay taageero dheeri ah si aan u ballaarinno gargaarkan, taas oo muhiim u ah qoysaskan si ay ugu laabtaan deegaannadooda oo ay dib u dhistaan noloshooda,” ayuu yiri wasiir Nuurani. “Dadka ay abaaruhu sida aadka ah u saameeyeen waa xoolo-dhaqatada oo noloshoodu ku tiirsan tahay xoolaha ay dhaqdaan. Haddaanu nahay Dowlad Goboleedka Jubbaland, qoysas badan ayaan u caawinay, annagoo u qeybinay ari.”
Barnaamijka dib u dejinta ayaa qeyb ka ah qorshe ballaaran oo lagu xasilinayo gobolka, loogana hortagayo in qoysaska barakacayaasha ah ay la kulmaan dhibaatooyin hor leh. Dowlad goboleedka Jubbaland ayaa waxaa saameyn weyn ku yeeshay abaaraha iyo fatahaadaha, waxaana qorshahan looga gol leeyahay in lagu yareeyo saameynta ay ku yeelanayaan dadka deegaanka.
. Qaybinta xooluhu waa tallaabo muhim ah oo lagu caawinayo qoysaska ay dhibaatadu saameysey inay dib u helaan maciishada iyo xaqiijinta adkeysiga muddada fog.
