Xildhibaan Maalik Cabdalla oo ka tirsan Baarlamaanka Somaliya ayaa si cad u dhaliilay Xukuumadda uu hogaamiyo Ra’iisal Wasaare Xamza Cabdi Barre oo uu ku eedeeyay inay gudan weysay shaqooyinkii loo igmaday isla-markaana ay dhibaato ku hayso shacabka Somaliyeed.
Xildhibaanka ayaa soo hadal qaaday arrimo ay ka mid yihiin canshuuro cusub oo lagu soo rogay lacagaha mobilada ah iyo amni darada taagan.
Cabdala waxa uu sidoo kale sheegay in hubkii ay ugu tala galeen kooxda Al-Shabaab uu dhawaan ku dhamaaday gacanta dad shacab ah oo ku sugnaa magaalada Caabudwaaq, isagoo soo jeediyay in hubkaasi la doonayay in lagu dagaalamo ciidamada qaranka iyo dagaalyahanada beesha Macwisley ee la safan.
Xildhibaanka ayaa ku baaqay in uu iscasilo Ra’iisul Wasaare Xamza, isaga oo ka digay in haddii uusan xilka ka degin ay dhici karto in shacabka ay isugu soo baxaan waddooyinka, si la mid ah dhacdooyinkii ugu dambeeyay ee ka dhacay Kenya.
Dhaliilaha kasoo yeeray Cabdalla Cabdalla ayaa kusoo aadaya xili dowlada Somalia ay wajaheyso cadaadis xoogan oo ku aadan sidii wax looga qaban lahaa amaanka iyo arrimaha dhaqaalaha dalka.
Dhacdadii ka dhacday magaalada Caabudwaaq oo hub loogu talo galay Al-Shabaab laga helay gacmaha dadka shacabka ah, ayaa dhalisay su’aalo la iska weydiinayo waxtarka dadaallada ay dowladdu ugu jirto la dagaalanka argagixisada iyo sugidda amniga muwaadiniinteeda.
Baaqa Abdalla ee ku aadan in Ra’isul wasaare Xamza uu is casilo ayaa waxa ay ka turjumeysaa niyad jabka sii kordhaya ee ka imaanaya qaar ka mid ah Xildhibaanada iyo shacabka, kuwaasi oo aaminsan in maamulka hadda jira uusan wax badan ka qaban caqabadaha horyaala Qaranka.
Digniinta xildhibaanka ee ku aaddan mudaaharaadyada waddooyinka ee suurtagalka ah ayaa ku soo beegmaya dhacdooyin la mid ah kuwii ka dhacay Kenya, halkaasoo muwaadiniintu ay isugu soo baxeen waddooyinka si ay u muujiyaan inaysan ku qanacsanayn waxqabadka dowladda.
Dowladda Soomaaliya ayaan weli ka jawaabin dhaleeceynta Cabdalla iyo baaqyada ku aaddan in ra’iisul wasaaraha uu iscasilo.
Iyadoo ay xaaladdu sii socotoayaa la arki doonaa in xukuumaddu ay tallaabo ka qaadi doonto tabashada ay soo jeediyeen Xildhibaanka iyo shacabka, iyo haddii ay rabshado kale dhacaan.
