Wadooyinka Muqdisho ayaa maanta si weyn loo xiray, iyadoo dowladda Soomaaliya ay ku qabatay munaasabado lagu xusayay sanadguuradii ka soo wareegatay markii Koonfurta Soomaaliya ay xornimada ka qaateen gumeystihii Talyaaniga. Munaasabadan taariikhiga ah, oo sanad walba la xuso 1-da Luulyo, ayaa waxay kicisay tillaabooyin ammaan oo la adkeeyay iyo xaddiday gelitaanka gaadiidka ee magaalada oo dhan.
inta badan wadooyinka muhiimka ah ee magaalada Muqdisho ayaa saaka subaxii la xiray. Xiritaankan ayaa loo hirgeliyay si ay u fududaato munaasabad ka dhici doonta taalada Daljirka Masoon ee degmada Boondheere oo ah goob astaan u ah dabaaldega maalintan qiimaha weyn ku leh taariikhda Soomaaliya.
Gelitaanka agagaarka Daljirka Masoon ayaa si weyn loogu koobay dadka lugeynaya, iyadoo ciidamada kala duwan ee dowladda ay Dhoolatusyo sameeyeen, isla markaana feejignaan ka wadeen guud ahaan goobtaasi.
“Maalintan oo kale waxay ku beegan tahay maalintii ay Koonfurta Soomaaliya xornimada ka qaateen gumeystihii Talyaaniga, waana munaasabad qiimo weyn u leh dhammaan shacabka Soomaaliyeed,” ayuu yiri mas’uul ka tirsan dowladda, isagoo hoosta ka xariiqay muhiimadda xafladaha lagu qabto guud ahaan dalka.
Madaxweyne Xasan Sheekh Maxamuud oo ay wehliyaan mas’uuliyiin kale oo ka tirsan dowladda Soomaaliya ayaa lagu wadaa in ay ka qeyb galaan dabaaldag ka dhici doona Daljirka Masoon, iyagoo shacabka kala qeyb galaya xuska munaasabadda taariikhiga ah. Munaasabadan ayaa muujineysa xuska wadajirka ah iyo dabaaldegga midnimada, adkeysiga, iyo socdaalka loo marayo madaxbannaanida qaranka.
Guud ahaan dalka Soomaaliya ayaa sidan oo kale loo soo agaasimay munaasabado lagu xusayo maalintan oo ka tarjumaysa ahmiyadda ballaaran ee ay maalintani ku leedahay dhaqanka iyo taariikhda Soomaalida. Xafladaha iyo isu imaatinnada, lagu maamuusayo naf-hurnimadii iyo wax-qabadkii jiilalkii hore, waxay isu keeneen bulshooyinka dalka oo dhan.
