Qarax ka dhacay bannaanka maqaaxi lagu shaaheeyo oo ku taalla caasimadda Soomaaliya ee Muqdisho ayaa waxaa ku dhintay ugu yaraan shan qof, sida ay booliisku sheegeen.
Dadka qaar ayaa shaasha gudaha maqaayadda ku daawanayay ciyaartii finalka ee ciyaaraha Yurub ee u dhaxeysay Spain iyo England, markii gaari laga soo buuxiyay walxaha qarxa uu ku qarxay bannaanka, sidaasi waxaa yiri Maj. Cabdifitaax Aadan Xasa, afhayeenka booliiska Soomaaliya. Waxa uu warbaahinta u sheegay in ugu yaraan 20 qof oo kale ay ku dhaawacmeen weerarka.
Sawirro la soo dhigay online-ka oo la sheegay in goobta laga soo qaaday ayaa muujinayay dab ka kacay afaafka hore ee maqaayadda, qaraxa kadib.
“Qaar ka mid ah daawadayaasha ayaa dhaawacmay iyaga oo isku dayaya in ay ka boodaan darbiga maqaaxida, qaarna waxa ay ku dhaawacmeen isbuurasho,” goobjooge Ismaaciil Aadan ayaa ku sheegay taleefoonka.
Inta badan dadka ku waxyeeloobay qaraxa ayuu sheegay in ay ku sugnaayeen wadada xiliga uu qaraxa dhacayay.
Ilaa hadda ma cadda cidda ka dambeysay weerarka.
Weerarada kooxda islaamiga ah ee Al-Shabaab ayaa inta badan laga soo sheegaa magaalada Muqdisho iyo meelo kale oo ka tirsan Soomaaliya. Kooxdan ayaa ka soo horjeeda dowladda federaalka Soomaaliya, taasoo ku xiran taageerada ciidamada shisheeye si ay xukunka ugu sii jiraan.
Laakiin Muqdisho ayaa inta badan nabad ahayd bilihii la soo dhaafay.
Deganaanshahaas ayaa sabtidii ku jabay isku day xabsi oo ay sameeyeen maxaabiis ku jirtay xabsiga Muqdisho. Weerarkaas oo ay ku dhinteen ugu yaraan 8 qof ayaa maxaabiista lagu helay in ay ku lug lahaayeen weerarrada Al-Shabaab waxa ay rasaas isweydaarsadeen ilaalada xabsiga ka hor inta aan la dilin.
Dowladda Soomaaliya ayaa wada howlgalo heer sare ah oo ka dhan ah kooxda xagjirka ah, taasi oo Mareykanku uu ku tilmaamay mid ka mid ah ururada ugu dilalka badan ee Al-Qaacida.
Madaxweynaha Soomaaliya Xasan Sheekh Maxamuud ayaa ku dhawaaqay “dagaal guud” oo ka dhan ah kooxaha xagjirka ah, kuwaas oo maamula qeybo badan oo ka mid ah bartamaha iyo koonfurta Soomaaliya, waxaana duqeymo badan oo diyaaradaha Mareykanka ay ka fuliyeen sanadihii la soo dhaafay.
