Soomaaliya oo ka qeyb gashay shirkii 46-aad ee Golaha Wasiirada EAC oo ka furmay magaalada Caruusha ee dalka Tanzania.

Wasiirka Arrimaha Dibadda iyo Iskaashiga Caalamiga ee Xukuumadda Soomaaliya Danjire Axmed Macalin Fiqi, ayaa dalka ku matalay shirkii caadiga ahaa ee 46-aad ee Golaha Wasiirada Bariga Afrika oo lagu qabtay magaalada Caruusha ee dalka Tanzania.

Shirkan oo ahaa mid muhiim ah ayaa la sheegay in diiradda lagu saaray arrimaha gobolka, sida ganacsiga, horumarinta kaabayaasha dhaqaalaha, isu socodka xorta ah ee badeecadaha iyo dadka, nabadda iyo amniga.
Hogaamiyayaasha ayaa ka dhawaajiyay in wadashaqeyntu ay muujineyso in wadahadaladu ay muhiim u yihiin xoojinta isdhexgalka iyo kobcinta iskaashiga wadamada xubnaha ka ah Bulshada Bariga Afrika.

Shirka Golaha Wasiirada ee EAC ayaa dejiyay qaban qaabada Shir Madaxeedka 24-aad ee Caadiga ah ee Madaxda Wadamada EAC iyo Munaasabad si heer sare ah loo soo agaasimay oo lagu xusayay sanadguuradii 25-aad ee Ururka Bulshada Bariga Afrika.

Fiqi ayaa tilmaamay in ka qeybgalka firfircoon ee dalka uu hoosta ka xariiqayo sida ay uga go’an tahay is dhexgalka gobolka iyo hamiga ay u qabaan in ay si rasmi ah ula jaan qaadaan aragtida EAC ee ku aaddan Bariga Afrika oo mideysan oo barwaaqo ah.

Madaxweynaha Soomaaliya Xasan Sheekh Maxamuud ayaa la filayaa inuu ka qeyb galo shirka madaxda dowlad goboleedyada, isagoo dib u xaqiijinaya in Soomaaliya ay la jaanqaadi doonto hadafyada la wadaago ee gobolka Bariga Afrika.

Soomaaliya ayaa dabayaaqadii 2023 si rasmi ah ugu biirtay Bulshada Bariga Afrika, iyadoo noqotay xubintii sideedaad ee ururka gobolka. Hadda waa ka qaybqaate firfircoon EAC.