Saciido Cabdi, oo muddo dheer ku jirtay raadinta shaqo, ayaa ka hadashay caqabado iyo dhacdooyin ay sheegtay inay la kulantay intii ay shaqo raadinta ku jirtay, kuwaas oo ay ku tilmaantay kuwo niyad jab iyo walaac ku reebay.
Saciido oo wareysi gaar ah siisay Kaab TV ayaa sheegtay in ay shaqo raadinta bilowday sannadkii 2013, iyadoo ilaa hadda, sannadka 2026, ay weli raadineyso fursad shaqo oo ay ku dabarto nolosheeda.
Waxay sheegtay in intii ay shaqada raadineysay ay la kulantay rag ay ku eedeysay inay shaqo siin ku xireen arrimo aan shaqada la xiriirin, iyadoo sheegtay in qaar ka mid ah ragga ay la kulantay ay dalbadeen inay xiriir gaar ah la yeelato ama ay hotel ugu tagto, ka hor inta aysan helin shaqo.
Saciido waxay sheegtay in dhacdooyinkaasi ay ku reebeen murugo iyo niyad jab, balse ay weli sii waday raadinta shaqo, maadaama ay u baahnayd dakhli ay nolosheeda ku maareyso.
Saciido ayaa sheegtay in shaqo raadinteedu ay soo bilaabatay sannadkii 2013, iyadoo sannado badan isku dayaysay inay hesho fursad shaqo.
Waxay tilmaantay in inkastoo ay leedahay xirfado ay shaqo ku qaban karto, haddana ay mararka qaar ku qasbanaatay inay raadsato shaqooyin aysan markii hore qorsheyn, gaar ahaan shaqooyinka nadaafadda.
Waxay sheegtay inay tagtay meelo kala duwan oo shaqaalaha nadaafadda laga raadinayay, iyadoo rajeynaysay in xitaa haddii mushaharku uu yar yahay uu wax ka tari karo nolosheeda.
Saciido waxay sheegtay in shaqo raadinta ay ku bixisay waqti badan, isla markaana marar badan ay ka soo laaban jirtay xafiisyo iyadoo aan helin shaqadii ay doonaysay.
Saciido waxay sheegtay in baahida shaqo ay gaarsiisay heer ay raadiso shaqooyin nadaafadeed, inkastoo ay sheegtay inay leedahay xirfado kale.
Waxay tilmaantay in marka qof shaqo nadaafadeed doonaya uu xafiis tago, mararka qaar laga qaato lambarka telefoonka, kadibna loo sheego in lala soo xiriiri doono.
Waxay sheegtay in qaar ka mid ah ragga ay lambarkeeda qaateen ay habeenkii soo wici jireen, balse halkii ay uga sheegi lahaayeen shaqada, ay marka hore weydiin jireen xaaladdeeda iyo caafimaadkeeda, kadibna ay ugu yeeri jireen xafiis.
Saciido ayaa sheegtay in markii ay xafiiska tagto ay mararka qaar la kulmi jirtay hadallo aysan fileyn.
“Shaqo ayaan kuu hayaa, laakiin jirkaaga ayaan u baahanahay”Saciido waxay sheegtay in mid ka mid ah dhacdooyinka ugu murugada badan uu ahaa nin ay u tagtay iyadoo raadineysa shaqo.
Waxay sheegtay in ninkaasi markii hore uu ka qaaday lambarkeeda, kadibna uu soo wacay, iyadoo markii ay xafiiska ugu tagtay uu u sheegay in shaqada ay dooneyso ay jirto.
Sida ay Saciido ku sheegtay wareysiga, ninka ayaa markii dambe u sheegay in isaga iyo iyada ay “is fahmeen”, isagoo dalbaday inay xiriir gaar ah la yeelato.
Saciido waxay sheegtay inay si cad ugu jawaabtay in aysan shaqo u imaanin inay jirkeeda bixiso, balse ay shaqo u baahan tahay.
Waxay tiri hadii shaqo loo hayo ay diyaar u tahay inay shaqada qabato, balse haddii shaqo aysan jirin aysan diyaar u ahayn inay aqbasho wax kale.
Sida ay sheegtay, ninka ayaa markaas ku adkeystay in arrinta ay ahayd “isfaham”, taasoo ay sheegtay inay ka dhigtay inay goobta ka soo baxdo iyadoo niyad jab iyo murugo dareemeysa.
Hotel loogu yeeray iyo dalab ay sheegtay inuu ka helay nin kale,Saciido waxay sidoo kale ka sheekeysay dhacdo kale oo ay sheegtay inay la kulantay xilli ay shaqo raadinaysay
Waxay sheegtay in nin ay xafiis ugu tagtay uu u sheegay in shaqada ay rabto uu siin karo, balse uu doonayay inuu marka hore jirkeeda arko.
Sida ay sheegtay, ninka ayaa ku yiri in haddii ay shaqo rabto ay hotel ugu timaado, halkaasna ay ku wada raaxeysanayaan.
Saciido waxay sheegtay in ninka uu sidoo kale hadalka u dhigay qaab ah in haddii ay xiriir ama raaxo rabto uu xitaa guur diyaar u yahay.
Hase yeeshee, waxay sheegtay inay si cad u diiday dalabkaas, maadaama ujeeddadeedu ahayd inay shaqeyso oo ay hesho dakhli, aysan ahayn inay shaqo ku beddesho xiriir gaar ah.
“Waxaan arkay gabdho badan oo sidaas ii sheegay”Saciido waxay sheegtay in markii hore ay ku adkeyd inay rumeysato in gabdho kale ay la kulmaan xaalado noocan ah.
Laakiin, sida ay sheegtay, markii ay iyadu la kulantay dhacdooyinkan, waxay ogaatay in gabdho kale ay sidoo kale ka sheekeeyeen waayo-aragnimo la mid ah.
Waxay sheegtay in qaar ka mid ah gabdhaha ay la kulantay ay u sheegeen in rag shaqooyin haysta ama shaqaale raadinaya ay iyaguna la kulmeen dalabyo aan shaqada la xiriirin.
Saciido waxay arrintan ku tilmaantay dhibaato ku dhacda qofka shaqo raadiska ah marka baahi dhaqaale ay jirto, gaar ahaan haweenka aan haysan ilo dhaqaale oo kale.
Saciido waxay sidoo kale si faahfaahsan uga sheekeysay dhacdo ay sheegtay inay ka dhacday xafiis ku yaalla Banaadir.
Waxay sheegtay inay la kulantay nin ay u tagtay iyadoo raadineysa shaqo nadaafadeed.
Sida ay sheegtay, ninka ayaa markii hore u sheegay inuu shaqo hayo, wuxuuna ka qaatay lambarkeeda isagoo u sheegay inuu soo wici doono.
Maalintii xigtay ayay dib ugu noqotay xafiiska.Saciido waxay sheegtay in markii ay tagtay ay xafiiska ku jireen dad kale, kuwaas oo muddo ku dhow laba saacadood fadhiyay.
Waxay sheegtay in markii dambe dadkii kale ay meesha ka tageen, iyadoo iyada iyo ninkii xafiiska joogay oo keliya ay meesha ku hareen.
“Guri ama qol ayuu ii tilmaamay”Saciido waxay sheegtay in ninkaasi markii dadka kale ay baxeen uu kursi soo qaatay oo uu agteeda dhigtay.
Waxay sheegtay in ay ka shakiday xaaladda, maadaama ay muddo dheer sugeysay iyadoo u timid shaqo.
Markii ay weydiisay waxa uu damacsan yahay, sida ay sheegtay, ninka ayaa isku dayay inuu dejiyo, isagoo u sheegay in wax walba ay fududaan doonaan oo ay shaqada heli doonto.
Saciido waxay sheegtay in markii dambe ninka uu u tilmaamay qol, isagoo u sheegay inay gudaha u gasho.
Sida ay hadalkeeda ku sheegtay, markii ay isku dayday inay baxdo ninka ayaa daba socday, balse ay ku guuleysatay inay meesha ka baxsato.
Waxay sheegtay inay markaas telefoonkeeda ka jartay ama ay qofka xannibtay, iyadoo go’aansatay inaysan mar dambe xiriir la sameyn.
Saciido waxay sheegtay in waayo-aragnimadeeda ay bartay in qofka shaqo raadiska ah, gaar ahaan qofka dhaqaale ahaan dhibaateysan, uu mararka qaar wajahayo dad isku dayaya inay ka faa’iideystaan baahidiisa.
Waxay sheegtay in shaqo la’aantu aysan ahayn oo keliya arrin dhaqaale, balse ay sidoo kale qofka gelin karto xaalado adag oo nafsi iyo bulsho.
Waxay ku boorrisay dadka shaqo raadiska ah, gaar ahaan haweenka, inay ka taxaddaraan dadka shaqo ku ballanqaadaya shuruudo aan shaqada xiriir la lahayn.
Sheekada Saciido waxay sidoo kale dib u soo celinaysaa doodda ku saabsan caqabadaha ay haweenku la kulmaan marka ay raadinayaan shaqo.
Qof shaqo raadinaya wuxuu u baahan yahay inuu helo fursad uu xirfaddiisa ku muujiyo, iyadoo shaqaaleysiintu ku salaysnaato aqoon, khibrad iyo shuruudaha shaqada.
Haddii shaqo lagu xiro xiriir gaar ah ama dalab galmo, arrintu waxay ka gudbaysaa xuduudda shaqaaleysiinta caadiga ah waxayna noqon kartaa arrin u baahan in hay’adaha ay khusayso ay baaritaan ku sameeyaan, gaar ahaan haddii ay jirto cadaadis ama khasab.
Inkasta oo ay ka sheekeysay dhacdooyin ay ku tilmaantay kuwo murugo leh, Saciido waxay sheegtay inaysan weli ka quusan shaqo raadinta.
