Maalinta beri ah ayaa lagu wadaa in doorashada deegaanka ay ka dhacdo degmooyinka Garoowe Dangoroyo iyo Godob-jiiraan oo dhamaantood ka tirsan gobolka Nugaal 431 musharrax ayaa ku tartami doona 81 kursi oo ka tirsan degmooyinka saddexdan degmo.
Ku simaha Guddoomiyaha Guddiga Doorashooyinka Puntland Axmed Maxamuud Cumar ayaa maanta faah faahin ka bixiyay qaabka ay u dhaceyso doorashada iyo qaabka ay u dhaceyso Cumar oo la hadlay warbaahinta ayaa ku nuux-nuux saday in ciidamada ammaanka la geeyay si ay u sugaan xasiloonida iyo ammaanka goobaha cod bixinta.
“Waxaan qaadnay tallaabooyin ballaaran si aan u hubinno in doorashadu ay u dhacdo si habsami leh oo ammaan ah,” ayuu yiri Cumar. “Shaqaalaha amniga ayaa meesha jooga si ay u ilaaliyaan codbixiyayaasha iyo shaqaalaha doorashada inta ay socoto hawsha.”
Cumar ayaa sidoo kale la hadlay shacabkii soo doortay, isagoo ku booriyay inay raacaan nidaamka codeynta ee loo dejiyay isla markaana ay u diyaar garoobaan sidii ay codkooda ugu dhiiban lahaayeen xisbiyada ay doorteen Waxa uu ku dhiiri galiyay dhamaan taageerayaasha dhinac walba in ay is dejiyaan oo ay si nabad ah uga qayb qaataan, isagoo caddeeyay in guddigu uu diyaar u yahay in uu xaliyo wixii cabashooyin ah ee ka soo baxa.
“Hannaanka doorashada si wanaagsan ayaa loo qorsheeyey, waxaana leenahay habab aan wax uga qaban karno wixii dhibaato ah ee imaan kara Waxaa muhiim ah in dhammaan ka qaybgalayaasha ay ixtiraamaan nidaamka oo ay gacan ka geystaan doorasho xalaal ah oo habsami leh,” ayuu Cumar hadalkiisa ku daray.
Guddiga doorashada Puntland ayaa sidoo kale soo saaray xogta codbixiyayaasha doorashooyinka soo socda. Magaalada Garoowe ee xarunta dowlad goboleedka Puntland waxaa iska diiwaan geliyay 49,801 oo qof. Dangoroyo 10,827 codbixiye ayaa la filayaa, halka Godobjiiraan ay isu diiwaangeliyeen 3,021 codbixiye.
Tirada badan ee musharrixiinta ayaa ka tarjumaysa muuqaal siyaasadeed oo firfircoon iyo muwaadiniin ku hawlan oo u hanqal taagaya qaabaynta mustaqbalka bulshooyinkooda.
