Guddoomiyaha Hay’adda Maareynta Musiibooyinka Qaranka, Maxamuud Macallin oo uu wehliyo ku-xigeenkiisa Dr. Axmed A. Aadan, ayaa xafiiskiisa ku qaabilay mas’uuliyiin ka tirsan xafiiska Ra’iisul Wasaaraha oo uu horkacayay ku-xigeenka Xoghayaha Joogtada ah ee Hay’adda C/risaaq Cali iyo Hoggaamiyaha Tiirka Bulshada ee Qorshaha Isbedelka Qaranka. .
Kulanka ayaa diiradda lagu saaray isku xirka qorsheynta khatarta musiibooyinka iyo tiirka ballaaran ee bulshada ee Qorshaha Isbeddelka Qaranka.
Gudomiye Moallim waxa uu carabka ku adkeeyay muhiimada ay leedahay in la isku daro qorshaynta khatarta musiibada iyo tiirka bulshada si loo xaqiijiyo hab dhamaystiran oo loo maareeyo masiibooyinka. Waxa uu tilmaamay in loo baahan yahay isku xirka iyo wadashaqeynta Hay’adda Maareynta Musiibooyinka Qaranka iyo Xafiiska Ra’iisul Wasaaraha si wax looga qabto dhibaatooyinka bulsho iyo dhaqaale ee ay geystaan musiibooyinka.
Ku-xigeenka Xoghayaha Joogtada ah Cabdirisaaq Cali ayaa qiray muhiimadda ay leedahay qorsheynta khatarta musiibooyinka iyo in ay la jaanqaadaan Qorshaha Isbeddelka Qaranka. Wuxuu carrabka ku adkeeyay sida ay dowladda uga go’an tahay wax ka qabashada sababaha asaasiga ah ee masiibooyinka iyo dhisidda adkeysiga bulshada.
Kulanka ayaa gabagabadiisa lagu ballamay in la dhiso koox-shaqaale si ay u horumariyaan qaab-dhismeedka isku xirka qorshaynta khatarta masiibooyinka iyo tiirka bulshada ee Qorshaha Isbadalka Qaranka. Kooxda shaqada waxaa ka mid noqon doona wakiilo ka socda Hay’adda Maareynta Musiibooyinka Qaranka, xafiiska Ra’iisul Wasaaraha, iyo dadka ay khuseyso.
Hay’adda Maareynta Musiibooyinka Qaranka ayaa si firfircoon ula shaqeyneysay qeybaha kala duwan ee bulshada si loo xoojiyo dadaallada lagu maareynayo musiibooyinka dalka. Hay’addu waxay bilihii u dambeeyay kulamo la yeelatay wakiilo ka socday Guddida Iskaashatada Kalluumaysiga ee Dan-kulmis oo ay ka wada xaajoodeen sidii looga taxadiri lahaa doonyaha kalluumaysiga ee duufaanta Laly ee ku wajahan gobolka.
Hay’addu waxay kaloo si dhow ula shaqaynaysay Hay’adda Cunnada iyo Beeraha ee Qaramada Midoobay (FAO) si loo saadaaliyo, looga jawaabo, loogana soo kabsado masiibooyinka cimiladu keento. Waxay ku heshiiyeen inay sii kordhiyaan iskaashigooda si kor loogu qaado adkeysiga iyo u diyaargarowga masiibooyinka soo noqnoqda iyo kuwa daran.
Iyadoo dalku uu weli ku jiro wajaha khataro kala duwan oo musiibo ah, Hay’adda Maareynta Musiibooyinka Qaranka waxa ay weli ka go’an tahay in ay la shaqeyso dhammaan dhinacyada ay khuseyso si loo dhiso qaran adkaysi u leh.
