Ciidamo ka tirsan booliska Soomaliland ayaa waxaa ay howlgallo kala duwan ka sameeyeen Magaalada laas-caanood ee Xarunta Gobolka Sool, halkaas oo bilihii la soo dhaafay ay ka dhaceen falal Amni darro.
Ciidamada ayaa howlgalka waxaa ay ka sameeyeen xaafadaha qaar ee Magaalada Laas-caanood, iyaga oo sidoo kale wadooyinka ku baarayay Gaadiidka yaryar, halka mararka qaar muraayadaha madow ay ka fiiqayeen.
Dad ku sugan Magaalada laas-caanood ayaa waxaa ay sheegeen in Ciidamada ay howlgalka ku qab qabteen dad farabadn, kuwaas oo la geeyay Saldhiga Booliska Magaalada laas-Caanood.
Saraakiisha Ciidamada Soomaliland ee Magaalada laas-Caanood weli faah fahin kama bixin howlgalalda iyo dadka lagu soo qabtay, hayeeshee dhowr jeer ayay sheegeen inay sameyn donaan howlgallada si amniga loo sugo.
Magaalada laas-caanood ee Xarunta Gobolka Sool ayaa dhowrkii bilood ee la soo dhaafay waxaa ka dhacayay dilal qorsheysan oo qaarkood loo geystay askar, waxaana weli jirin cid sheegatay mas’uuliyada dilalkaas.
