Dagaallada iyo rabshadaha ka dhacay magaalada Mooyaale ee xuduudda Itoobiya iyo Kenya ayaa sababay barakac ballaaran, iyadoo ku dhowaad 50,000 oo qof ay ka qaxeen guryahoodii, una tallaabeen dhinaca dalka Kenya si ay uga badbaadaan colaadda.
Qaramada Midoobay ayaa sheegtay in dadka barakacay ay isugu jiraan qoysas rayid ah oo ka cararay dagaallada toddobaadkii hore ka dhacay magaalada Mooyaale iyo deegaanada ku dhow. Rabshadaha ayaa sidoo kale sababay in ganacsiyo badan albaabada loo laabo, halka isu-socodkii ganacsiga iyo gaadiidka ee magaalada uu hakad galay.
Wakiilka Hay’adda Qaramada Midoobay u qaabilsan Qaxootiga ee Kenya, Fatima Maxamed-Cole, ayaa ka digtay in tirada dadka barakacaya ay sii kordhi karto haddii aan si degdeg ah loo joojin dagaallada.
Sida ay sheegeen dadka deegaanka, colaadda ayaa bilaabatay kaddib markii calanka Dowlad Deegaanka Soomaalida Itoobiya laga taagay dhul lagu muransan yahay oo ka tirsan magaalada Mooyaale, taas oo markii dambe dhalisay iska horimaadyo hubeysan oo dhexmaray dhinacyada deegaanka.
Mooyaale ayaa ah magaalo xuduudeed muhiim ah oo ay wada maamulaan dhinacyada Oromada iyo Dowlad Deegaanka Soomaalida Itoobiya, waxaana muddooyinkii dambe ka jiray muranno la xiriira maamulka iyo lahaanshaha dhulka.
Dagaallada ayaa sababay khasaare isugu jira dhimasho, dhaawac iyo burbur hantiyeed, iyadoo dad badan ay ka carareen guryahooda, halka ganacsatada iyo dadka ku tiirsan isu-socodka xuduudaha ay wajahayaan saameyn dhaqaale.
Dhanka Kenya, mas’uuliyiinta dowladda ayaa walaac ka muujiyay tirada dadka rayidka ah ee ka soo gudbaya xuduudda, kuwaas oo magangalyo ka raadinaya deegaanada Kenya.
Xildhibaanada Guyo Waqo Jaldesa oo laga soo doortay Mooyaale iyo Dido Cali Rasso oo laga soo doortay Saku ayaa shir jaraa’id oo ay ku qabteen magaalada Nairobi ugu baaqay dowladda Kenya iyo hay’adaha caalamiga ah inay gargaar degdeg ah gaarsiiyaan dadka ay saameeyeen colaadaha.
Dido Cali Rasso ayaa sheegay in dagaallada ka socda dhinaca Itoobiya ay sababeen in dad badan oo rayid ah ay u qaxaan Kenya, taas oo cadaadis ku abuurtay adeegyada bulshada, kaabayaasha dhaqaalaha iyo kheyraadka deegaanka.
Xaaladda Mooyaale ayaa weli walaac ku haysa dadka ku nool labada dhinac ee xuduudda, iyadoo sii socoshada colaadda ay halis gelin karto amniga, ganacsiga iyo isu-socodka dadka ee deegaan muhiim u ah isku xirka Itoobiya iyo Kenya.
