Madaxweynaha Puntland Siciid Cabdullaahi Deni ayaa ku dhawaaqay in uusan mar saddexaad u tartami doonin madaxtinimada Puntland, islamarkaasna doorka soo socda uu dhisayo qofka uu sharraxo xisbiga xukuumadda ee Kaah.
Madaxweyne Deni oo xalay hadal ka jeediyay magaalada Gaalkacyo ayaa yiri “dastuurku laba jeer ayuu ii oggol yajay hoggaanka Puntland, labadii jeerna waan la i doortay, laba sanno ayaa ii hartay, ninka doonaya xilka ha iskeeno doorasho xor ah oo waqtigeeda ku dhacda, xisbigeenna musharrax ayuu yeelanayaa oo aan dhisaynaa.”
Hadalka madaxweyne Deni waxa uu meesha ka saarayaa hadalhayn ka taagnayd furista dastuurka Puntland, iyada oo mucaaradka ay ka welwel sanaayeen in uu mar saddexaad tartamo madaxweyne Deni.
Go’aankan ayaa muhiimad gaar ah u leh siyaasadda Puntland, maadaama uu saameyn ku yeelan karo tartanka siyaasadeed ee doorashada soo socota iyo cidda hoggaanka Puntland la wareegi karta.
Marka hoggaamiye xilka haya uu horey u sii caddeeyo inuusan mar kale tartamayn, waxay siyaasiyiinta kale siinaysaa fursad ay ku bilaabaan diyaar-garowga doorashada.
Go’aanka Madaxweynaha Puntland wuxuu sidoo kale yareyn karaa hubanti-la’aanta ku saabsan mustaqbalka siyaasadeed ee Puntland.
Haddii uu si dhab ah u dhaqan geliyo ballanqaadkiisa, doorashada soo socota waxay noqon kartaa mid si weyn loogu tartamo, maadaama uusan jirin madaxweyne xilka haya oo doonaya inuu muddo kale sii joogo.
Waxaa sidoo kale muhiim noqon doonta sida loo maareeyo geeddi-socodka doorashada, gaar ahaan arrimaha la xiriira nidaamka doorashada, xisbiyada siyaasadeed iyo hannaanka lagu dooranayo hoggaanka cusub.
Madaxweynaha Puntland ayaa hadda wuxuu hadda fursad u haystaa inuu dhiso dhaxalka siyaasadeed ee maamulkiisa, iyadoo laga qiimeyn doono waxqabadkiisa intii uu xilka hayay.
Sidoo kale, haddii uusan tartamin, wuxuu door ka ciyaari karaa jihada siyaasadeed ee Puntland xitaa marka uu xilka ka dego, gaar ahaan haddii uu taageero musharrax ama koox siyaasadeed.
Bilaha iyo sannadaha soo socda waxaa la filan karaa dhaq-dhaqaaq siyaasadeed oo xooggan, iyadoo ay soo bixi karaan musharraxiin cusub oo doonaya inay hoggaanka Puntland qabtaan.
Waxa ugu muhiimsan ayaa noqon doona in tartanka siyaasadeed uu ku dhaco si nabad ah, isla markaana dhinacyada siyaasadda Puntland ay ixtiraamaan xeerarka iyo hannaanka doorashada.
Ku dhawaaqista Siciid Cabdullaahi Deni ee ah inuusan mar saddexaad u tartami doonin madaxtinimada Puntland waxay fure u noqon kartaa bog cusub oo siyaasadeed.
Waxaa la wada sugayaa cidda madaxweyne Deni u dhisi doono musharraxa xisbiga Kaah ee doorashada 2029, iyada oo la filayao in loolan arag uu ka dhex bilaamo xisbiga xukuumadda.
