Soomaaliya ayaa mar kale wajahaysa halis macluul oo sii xoogeysanaysa, kadib warbixin cusub oo muujisay in malaayiin qof ay ku jiraan xaalad gaajo ba’an, xilli abaarta daba dheeraatay, colaadaha iyo hoos u dhaca gargaarka bani’aadannimo ay si wadajir ah u sii xumeeyeen xaaladda nololeed ee dalka.
Warbixinta ay soo saartay hay’adda qiimeysa sugnaanta cunnada ee IPC ayaa sheegtay in in ka badan lix milyan oo Soomaali ah ay wajahayaan cunto yari aad u daran, halka malaayiin carruur ah ay halis ugu jiraan nafaqo-darro ba’an inta lagu jiro sanadkan 2026.
IPC waxay sheegtay in ku dhowaad 1.9 milyan oo carruur Soomaali ah ay u baahan doonaan gargaar caafimaad iyo nafaqo degdeg ah, iyadoo qaybo kamid ah Soomaaliya lagu tilmaamay meelaha ugu dhow in si rasmi ah loogu dhawaaqo macluul.
Hay’addu waxay sheegtay in gargaarka bani’aadannimo uu weli yahay “xarigga keliya ee lagu badbaadin karo nolosha”, balse uu hadda gaarayo boqolkiiba aad u yar oo kamid ah dadka ku jira heerarka ugu daran ee gaajada.
“Waxaa si degdeg ah loogu baahan yahay in la kordhiyo gargaarka bani’aadannimo ee dhinacyo badan leh, gaar ahaan meelaha xaaladdu ugu daran tahay sida Burhakaba, si looga hortago dhimasho iyo xaalad sii xumaata,” ayay tiri IPC.
Warbixintu waxay sidoo kale iftiimisay saameynta ka dhalatay dhimista gargaarka caalamiga ah, gaar ahaan taageeradii Mareykanka, kadib markii maamulka madaxweyne Donald Trump uu hakad geliyay qaybo badan oo kamid ahaa dhaqaalihii ay Soomaaliya ka heli jirtay hay’adda USAID.
Hay’adaha samafalka ayaa sheegay in tallaabadaasi ay si weyn u wiiqday adeegyadii cuntada, caafimaadka iyo taageerada nololeed ee malaayiinta qof ku tiirsanaayeen gudaha Soomaaliya.
Agaasimaha Save the Children ee Soomaaliya, Maxamed Maxamuud Xasan, ayaa sheegay in dalka uu galay marxalad bani’aadannimo oo aad u khatar badan, isagoo ka digay in waqtiga looga hortagi karo macluul uu si degdeg ah u sii yaraanayo.
“Carruur ayaa u dhimanaya sababo laga hortagi karo sida nafaqo-darro, cudurro iyo barakac, xilli dhaqaalihii gargaarku uu aad uga hooseeyo baahida jirta,” ayuu yiri Maxamed.
Dhanka kale, madaxa International Rescue Committee ee Soomaaliya, Richard Crothers, ayaa sheegay in Soomaaliya ay mar kale taagan tahay qarka musiibo, isagoo ku eedeeyay beesha caalamka inay ku guuldarreysatay inay si degdeg ah uga jawaabto digniinaha ku saabsan gaajada dalka.
