La-taliyaha Amniga Qaranka Soomaaliya Xuseen Macallin Maxamuud ayaa wuxuu ku faahfaahiyay xog ku saabsan imaatinka ciidamada shisheeye ee la filayo iyo baaritaanka lagu hayo hubkii dhawaan lagu qabtay Caabudwaaq.
La-taliyaha Amniga Qaranka Soomaaliya ayaa sheegay in dhawaan la filayo in Soomaaliya ay soo gaaraan ciidamo ka socda dowladda Turkiga kuwaasi oo qeyb ka ah heshiis dhanka difaaca ah oo ay wada gaareen dowladaha Soomaaliya iyo Turkiga “Ciidamada Turkiga ka imaanaya waxaa ka mid noqon doona shaqaale ka tirsan Ciidanka Badda Turkiga kuwaasi oo gacan ka geysan doona tababarka Ciidanka Badda Soomaaliya Tani waa qayb muhiim ah oo ka mid ah iskaashiga difaaca ee aan la leenahay Turkiga “ayuu yiri La-taliyaha Amniga Qaranka Soomaaliya Waxa uu ku nuux-nuux saday in faah faahin dheeri ah oo ku saabsan soo daad gureynta ciidamada badda ee Turkiga ay dib ka soo sheegi doonaan.
Isagoo ka hadlayay wararka ku saabsan ku lug lahaanshaha milateri ee Masar La-taliyaha Amniga Qaranka Soomaaliya wuxuu caddeeyay inaysan jirin wax qorshe ah oo ku saabsan in ciidamada Masar la geeyo Soomaaliya “Dowladda Masar ciidan uma soo dirayso Soomaaliya Doorkoodu waxa uu ku kooban yahay taageerada iyo taakulaynta xoojinta millatariga Soomaaliya Heshiisyada dhanka difaaca ee aan la galnay dowladaha aan saaxiibka nahay waa qeyb ka mid ah iskaashiga joogtada ah,” ayuu raaciyay.
Mar uu ka hadlayay dhacdadii dhawaan lagu soo qabtay hubkii lagu qabtay Caabudwaaq, Maxamuud ayaa xusay in weli uu socdo baaritaanka. Wuxuu ka gaabsaday inuu faahfaahin gaar ah ka bixiyo halka uu marayo baaritaanka, isagoo carrabka ku adkeeyay in hannaanka loo maareynayo si taxadar leh.
Hadalka Lataliyaha Amniga Qaranka ayaa muujinaya dadaallada socda ee Soomaaliya ay ku xoojineyso awooddeeda difaaca iyada oo loo marayo iskaashi caalami ah iyadoo wax laga qabanayo caqabadaha amniga gudaha.
