Maamulka Dowlad Goboleedka Koonfur Galbeed Soomaaliya ayaa ku dhawaaqay in ay qaadayaan tallaabooyin adag oo lagula xisaabtamayo dadka lagu eedeeyay in ay hurinayaan colaadaha u dhexeeya beelaha, isla markaana dhiirrigeliya rabshadaha iyo dilalka aargoosiga ah.
Mas’uuliyiin sare oo ka tirsan maamulka Koonfur Galbeed, oo ay ka mid yihiin Wasiirka Arrimaha Gudaha, Dowladaha Hoose iyo Dib u Heshiisiinta, ayaa sheegay in maamulka uu xoojiyay dadaallada nabadeed, isagoo ku hawlan wada-hadallo lala yeeshay odayaal dhaqameed iyo hoggaamiyeyaasha bulshada si loo soo afjaro xiisadaha beeleed ee taagan.
Wasiirka ayaa sheegay in ay jiraan shakhsiyaad ku nool meelo ka baxsan goobaha colaadda, kuwaas oo ku faafinaya fariimo kicin ah oo sii hurinaya rabshadaha, isagoo xusay in Maamulka uusan u dulqaadan doonin cid kasta oo qayb ka noqota xasilooni-darrada, isla markaana ay qaadayso tallaabo sharciga waafaqsan oo adag.
Dhanka kale, Wasaaradda Arrimaha Gudaha ee Koonfur Galbeed ayaa xaqiijisay in la gaaray heshiis nabadeed hordhac ah oo lagu joojinayo dagaalladii dhowaan ka dhacay deegaanka Diinsoor ee gobolka Baay, kuwaas oo u dhexeeyay maleeshiyaad isku haya arrimo beeleed.
War-saxaafadeedka wasaaraddu soo saartay ayaa lagu sheegay in maamulka uu sii raacayo dadka isku daya inay kala qeybshaan bulshada ama sii hurinayaan colaadihii hore, iyadoo lagu adkeeyay in cid kasta oo ku xadgudubta nabadda la horgeyn doono cadaaladda.
“Dowladdu waxay ka go’an tahay soo celinta nabadda iyo xoojinta dib u heshiisiinta beelaha walaalaha ah, Cid kasta oo faafisa naceyb ama kicisa rabshado waa in la marsiiyaa sharciga.” ayaa lagu yiri qoraalka wasaaradda.
Ugu dambayn, maamulka Koonfur Galbeed ayaa ugu baaqay shacabka deegaanada maamulkaasi in ay taageeraan hindisayaasha nabadeed ee socda isla markaana ay ku wargeliyaan hay’adaha amniga cid kasta oo isku dayda inay dib u huriso colaadaha beelaha.
