Hoggaanka danbi baarista DCI ee dalka Kenya ayaa ugu baaqay shacabka inay si iskaa wax u qabso ah u soo gudbiyaan xogta shan eedaysane, oo lala xiriirinayo inay xiriir la leeyihiin shabakadaha argagixisada gaar ahaan Ururka Al-Shabaab.
Afar ka mid ah Eedeysanayaasha ayaa la rumeysan yahay inay ku lug lahaayeen Weeraradii ugu dambeeyay ee ka dhanka ahaa ciidamada ammaanka ee ka dhacay ismaamulka Lamu iyo deegaanka Boni, halka tuhmanaha shanaad uu ku lug lahaa weerarkii lagu hoobtay ee ka dhacay Jaamacadda Garissa sanadkii 2014-kii, kaas oo sababay dhimashada 147 qof oo u badan arday.
“Haddii aad hayso wax macluumaad ah oo ku saabsan halka ay ku sugan yihiin tuhmanayaasha aan kor ku soo xusnay ee hawlahooda ay khatar weyn ku yihiin ammaanka Kenyaanka aan waxba galabsan, ha ka labalabayn inaad nala soo xiriirtaan ayaa lagu yiri ,” Warka kasoo baxay Hay’adda dambi barista Kenya DCI.
Xubnaha ay dowlada Kenya baadi goobeyso oo gaaraya ilaa 5 ayaa waxaa ay Magacyadooda kala yihiin:
Ramadan Hamisi Kufungwa
Kufungwa ayaa ka amar qaata dagaalyahanada Al Shabaab, waxaana uu isku dubbaridaa weerarada ka imaanaya Soomaaliya ee lagu bartilmaameedsanayo dadka Kenyaanka ah.
Waa isku xirka Kassim Musa Mwarusi, oo lagu eedeeyay in uu mas’uul ka ahaa fulinta weerarradii Boni iyo dhaqdhaqaaqa dadka la qorayo si ay ugu biiraan Al Shabaab iyo kooxaha kale ee argagixsada ee Kenya.
Ciise Cabdalla Axmed
Axmed oo ka soo jeeday magaalada Malindi ee ismaamulka Kilifi ayaa ku biiray Al Shabaab, waxaana uu u safray Soomaaliya sanadkii 2014-kii.
Dhowr jeer oo hore ayuu ka qeyb qaatay weeraro dalka ka dhacay, waxaana uu ka gaaray darajooyin uu ka mid noqday guutada is qarxinta.
Waxa uu hadda ku hawlan yahay qorsheynta weeraro ka dhan ah bartilmaameedyada dalka gudihiisa.
Axmed Cumar Siciid oo ku magac dheer Dogo Tabibuu,
Saciid ayaa sidoo kale ka soo jeeda deegaanka Malindi ee ismaamulka Kilifi, waxaana uu sanadkii 2016-kii ku biiray ururka Al-Shabaab, waxaana uu ka tirsanaa guutada Jaysh Ayman ee garabka sirdoonka Al-Shabaab.
Waxaa lagu eedeeyay inuu ka qeyb qaatay weeraro dhowr ah oo ka dhacay Keymaha Boni.
Macallin Yuusuf Xasan Cabdullaahi oo ku magac dheer Isaaq Xasan Cabdullaahi
Cabdullaahi ayaa loo raadinayaa dil saddex macalin loogu geystay deegaanka Qarsa ee ismaamulka Wajeer sanadkii 2018-kii iyo dilkii kaaliyihii madaxa deegaanka Gumurey December 2020.
Macalin Cabaas oo ku magac dheer Cabaas Guyo.
Waxaa lala xiriirinayaa qorsheynta weerarkii Jaamacadda Gaarisa ee bishii Abriil 2014 halkaas oo hal 147 qof ay ku naf waayeen weerarro kale oo ka dhacay dalka Kenya.
