Iyada oo dagaal uu ka socdo degmada Beled-xaawo ee Gobolka gedo, kaas oo u dhaxeeya ciidamada dowladda ay diyaaradaha ku geysay Gedo iyo kuwa Jubbaland ee uu hoggaaminayo Wasiirka amniga Jubbaland ayaa waxaa guulo ka kala sheegtay dowladda Soomaaliya & Maamulka Jubbaland.
Wasiirka Wasaaradda warfaafinta Soomaaliya Cismaan Dubbe ayaa sheegay in jabhad ay soo hubeysay dowladda Kenya ay soo weerareen Beled-xawo, hayeeshee ay iska difaaceen ciidamada dowladda jilibkana u dhigeen.
Dhinaca kale Madaxweyne kuxigeenka Jubbaland Maxamuud sayid Aadan ayaa sheegay in Ciidamada daraawiishta Jubbaland eek u sugnaa duleedka Beled-xaawo la soo weeraray, isla markaana ay iska difaaceen, iyaga oo kala garan waayay in Ciidamada dowladda ay geysay gobolkaas ay yihiin kuwa soo weeraray iiyo Al-Shabaab.
Madaxweyne kuxigeenka oo la hadlay BBC-da waxaa uu sheegay in Ciidamada Jubbaland ay la wareegeen degmada Beled-Xaawo ee gobolka gedo wallow aysan jirin dad madax bannaan oo xaqiijinaya sheegashada Maamulka Jubbaland.
Xaalada degmada Beled-Xaawo ayaa Maanta kacsan, waxana gebi ahaan Go’an Isgaarsiinta Magaalada, taas oo keentay in aan wax badan laga ogaan Karin khasaaraha ka dhashay dagaalka iyo xaalada magalada.
