Wasiiru dowlaha madaxtooyada Puntland, Cabdifataax Maxamed Cabdinuur, ayaa sheegay in ay cunaqabatayn xooggan saareen goobaha ay Daacish kaga harsan yihiin buuraleyda Calmíska, si looga jaro sahay kasta oo ay ku sii joogsan karaan.
Cabdifataax ayaa sheegay in meelaha ay Daacish ku dhuumaneyso si buuxda loo hareereeyay, ayna ka mid tahay qorshaha in laga xannibo raashiinka, shidaalka iyo adeegyadii kale ee gaari lahaa.
“Waxaa saaran dowladda iyo ciidankeeda culeys aad u weyn, waxaana ka mid ah in nimanka dhinac walba laga cunaqabateeyo oo aan waxba u gali karin, laguna hareereeysan yahay,” ayuu yiri.
Wuxuu xusay in xubno kooban oo Daacish ah ay weli si dhuumaaleysi ah ugu sugan yihiin qaybaha hoose ee buuraha Calmíska, balse wuxuu sheegay rajo ka muujiyay in hawlgallada socda ay ku dhamaan doonaan muddo kooban.
Wasiirku wuxuu sidoo kale tilmaamay in juqraafiga deegaanka ay caqabad weyn ku noqotay ciidamada, maaddaama dhulku yahay mid si weyn u dhib badan oo aan gaadiidka culus geli karin. “Ciidamada waxaad ku aragteen inay ku socdaan Dameero, Awr iyo xataa lug, sababtoo ah waa meel aad u adag in si fudud loo gaaro,” ayuu yiri Cabdifataax.
Waxaa uu intaas ku daray in ay ciidamada khasab ku noqotay in ay adeegsadaan farsamooyin kala duwan oo ku habboon deegaannada buuraha ah, si loo xaqiijiyo in kooxdaasi gebi ahaanba laga saaro meesha ay ku dhuumaaleysanayaan.
Hadalka wasiiru dowlaha madaxtooyada Puntland ayaa kusoo aadaya xilli shalay ay ku beegnayd markii la qorsheeyay in lagu dhawaaqo in lasoo afjaray howlgalka Hilaac ee muddada sanadka ah lagula dagaalamayay ururka Daacish.
Qorshaha ayaa dib u dhacay sababa la xiriira madaxweyne Deni oo ku maqan dibadda. Si kastaba ha ahaatee, weli dagaalamayaa katirsan Daacish ayaa ku sugan Baallade oo Boosaaso u jira 20km. Dad badan ayaa maamulka Puntland uga digay in lagu dhawaaqo in lasoo afjaray Daacish, iyadoo aan weli laga nadiifin togga Baallade iyo degaanada ku dhow.
