Wasiirka Boqortooyada Midowday ee u qaabilsan Horumarinta Caalamiga ah iyo Afrika, Kirsty McNeill, ayaa Muqdisho soo gaartay, iyadoo kulan ay la yeelatay , Xasan Sheekh Maxamuud, diiradda lagu saaray xaaladda siyaasadeed ee dalka, wada-hadalka dhinacyada siyaasadda iyo xoojinta xiriirka Soomaaliya iyo UK.
Kulanka ayaa dhacay shalay oo Talaado ahayd, waxaana maanta faahfaahin kooban ka soo saartay Safaaradda Boqortooyada Midowday ee Muqdisho.
Sida lagu sheegay qoraalka Safaaradda UK, labada dhinac waxay ka wada hadleen fursadaha lagu xoojin karo iskaashiga u dhexeeya Soomaaliya iyo Boqortooyada Midowday, iyadoo si gaar ah loo adkeeyay muhiimadda ay leedahay in Soomaaliya ay yeelato wada-hadal siyaasadeed oo loo dhan yahay, si loo gaaro dal ammaan badan oo xasilloon.
Kulanka Xasan Sheekh iyo Wasiir Kirsty McNeill ayaa kusoo beegmaya xilli siyaasadda Soomaaliya ay marayso marxalad xasaasi ah, iyadoo ay jiraan kala aragti duwanaansho u dhexeeya dowladda Federaalka iyo qaar ka mid ah dhinacyada siyaasadda iyo dowlad-goboleedyada.
Safaaradda UK ee Soomaaliya ayaa sheegtay in muhiimadda wada-hadalka siyaasadeed ee loo dhan yahay ay qayb ka ahayd qodobadii labada dhinac ay isla soo qaadeen.
Macnaha fariintan ayaa ah in UK ay u aragto wadahadal iyo is-afgarad siyaasadeed inay yihiin waddo muhiim u ah xasilloonida Soomaaliya, gaar ahaan iyadoo dalka uu wajahayo marxalad siyaasadeed oo la xiriirta geeddi-socodka doorashooyinka.
Marka laga soo tago arrimaha siyaasadda, kulanka waxaa sidoo kale looga hadlay xoojinta iskaashiga Soomaaliya iyo UK.
Labada dal ayaa muddo dheer iska kaashanayay arrimo ay ka mid yihiin horumarinta, amniga, dowlad-dhiska iyo arrimaha bani’aadannimada.
Booqashada Wasiir Kirsty McNeill ee Muqdisho ayaa sidaas darteed fursad u noqon karta labada dowladood inay dib u eegaan meelaha iskaashigooda lagu sii xoojin karo, gaar ahaan xilli Soomaaliya ay ku jirto marxalado siyaasadeed iyo amni oo muhiim ah.
Kulanka ayaa yimid iyadoo Soomaaliya ay ku jirto marxalad ay dood weyn ka taagan tahay hannaanka doorashooyinka iyo qaabka loo maareynayo geeddi-socodka siyaasadeed ee dalka.
Waxaa jira baaqyo soo noqnoqday oo ku aaddan in dowladda Federaalka iyo dhinacyada mucaaradka ay yeeshaan wada-hadal rasmi ah oo lagu xallinayo khilaafaadka jira, isla markaana lagu gaaro heshiis siyaasadeed oo ay dhinacyadu wada aqbalaan.
Beesha caalamka ayaa door muhiim ah ka ciyaarta taageerada geeddi-socodka siyaasadeed ee Soomaaliya, iyadoo dalalka iyo hay’adaha caalamiga ah ay si joogto ah ugu booriyaan madaxda Soomaalida inay khilaafaadka ku xalliyaan wada-hadal.
Wararka laga helayo dhinacyada siyaasadda ayaa muujinaya in ay socdaan dadaallo lagu doonayo in mar kale la isu keeno dowladda Federaalka iyo mucaaradka, si looga wada hadlo arrimaha doorashada iyo khilaafaadka siyaasadeed ee jira.
Haddii dadaalladaasi miro dhalaan, waxaa miiska wada-hadalka iman kara qodobo ay ka mid yihiin hannaanka doorashada, jadwalka geeddi-socodka siyaasadeed, doorka dowladda Federaalka iyo dowlad-goboleedyada, iyo sidii loo heli lahaa hannaan ay dhinacyada siyaasadda Soomaaliya ku wada qanacsan yihiin.
Sidoo kale, ka-qaybgalka dhinacyada kala duwan wuxuu siin karaa natiijada wada-hadalka sharciyad iyo aqbalaad ballaaran, taas oo muhiim u ah xasilloonida siyaasadeed ee dalka.
Xasan Sheekh Maxamuud iyo dowladda Federaalka ayaa hadda wajahaya cadaadis siyaasadeed oo gudaha iyo dibaddaba ah oo ku saabsan sidii loo heli lahaa heshiis siyaasadeed oo loo dhan yahay.
Dowladdu waxay u baahan tahay inay isku dheellitirto qorshayaasheeda siyaasadeed iyo baahida loo qabo in la helo is-afgarad ay aqbalaan dhinacyada kale ee siyaasadda.
Dhinaca kale, mucaaradka iyo dowlad-goboleedyada ayaa doonaya in laga qaybgeliyo go’aannada waaweyn ee saameynaya mustaqbalka siyaasadeed ee Soomaaliya.
Arrintan ayaa ka dhigaysa wada-hadalka siyaasadeed mid xasaasi ah, maadaama go’aannada laga gaaro xilligan ay saameyn ku yeelan karaan jihada siyaasadeed ee dalka sanadaha soo socda.
