Xildhibaan Yuusuf Ibraahim Afrax, oo si weyn loogu yaqaano Yuusuf Kabaale, ayaa laga celiyay Garoonka Caalamiga ah ee Jomo Kenyatta ee magaalada Nairobi, xilli uu doonayay inuu gudaha u galo dalka Kenya.
Dhacdadan ayaa kusoo beegmaysa xilli ay soo noqnoqdeen kiisaska mas’uuliyiin sare oo Soomaali ah oo lagu celiyay ama loo diiday inay gudaha u galaan Kenya, gaar ahaan Garoonka Jomo Kenyatta.
Ilaa hadda, dowladda Kenya si rasmi ah uma shaacin sababta Xildhibaan Yuusuf Kabaale looga celiyay dalka, sidoo kalena dowladda Soomaaliya ma aysan bixin faahfaahin dhammeystiran oo ku saabsan dhacdada.
Haddii warka xildhibaanka la xaqiijiyo, wuxuu noqonayaa mas’uulkii saddexaad ee sare ee dowladda Soomaaliya ee sanadkan lagu soo warramo in laga celiyo Kenya, kaddib dhacdooyinkii Jibriil Cabdirashiid Xaaji iyo Abshir Bukhaari.
Kiiska ugu weyn ee dhowaan dhacay wuxuu ahaa kan Ra’iisul Wasaare Ku-xigeenka Labaad ee Soomaaliya, Jibriil Cabdirashiid Xaaji.
Jibriil ayaa bishii Juun 2026 gaaray Garoonka Jomo Kenyatta, isagoo watay baasaboorka diblomaasiga ah ee Soomaaliya iyo fiiso Kenya ah.
Saraakiisha socdaalka Kenya ayaa, sida ay wararku sheegeen, su’aalo ka keenay dukumenti kale oo Kenyan ah.
Jibriil ayaa lagu hayay qaybta VIP-da ee garoonka, kaddibna dib loogu celiyay Muqdisho. Wararka ayaa sidoo kale sheegay in arrintu la xiriirtay tuhun ku saabsan helitaanka baasaboorka Kenya.
Dhacdadan ayaa dhalisay hadal-heyn xooggan, maadaama Jibriil uu yahay mas’uul sare oo ka tirsan dowladda Soomaaliya, isla markaana labada dal ay leeyihiin xiriir dhow oo dhinacyada amniga, ganacsiga iyo siyaasadda ah.
Wax ka yar bil kaddib dhacdadii Jibriil, waxaa soo baxday dhacdo kale oo la xiriirta Wasiiru-dowlaha Madaxtooyada Soomaaliya, Abshir Bukhaari.
Abshir Bukhaari ayaa lagu soo warramay in 26-kii July 2026 laga hor istaagay inuu gudaha u galo Kenya kaddib markii uu gaaray Garoonka Jomo Kenyatta.
saraakiisha socdaalka Kenya aya su’aalo waxaa ay ka weydiiyeen dukumentiyada safarka, gaar ahaan baasaboor Kenyan ah oo lagu eedeeyay inuu watay,Mas’uulka ayaa markii dambe lagu celiyay Muqdisho
Dhacdadan ayaa sii xoojisay xiisadda u dhexeysa Muqdisho iyo Nairobi, waxaana wararka qaarkood ay sheegeen in dowladda Soomaaliya ay u yeertay safiirka Kenya si looga dalbado faahfaahin ku saabsan waxa dhacay.
Xildhibaan Yuusuf Ibraahim Afrax, oo loo yaqaan Yuusuf Kabaale, ayaa hadda lagu soo warramayaa inuu isna ka mid noqday mas’uuliyiinta Soomaaliyeed ee Kenya ka hor istaagtay gelitaanka.
Wararka hordhaca ah ayaa sheegaya in xildhibaanka lagu celiyay isagoo jooga Garoonka Jomo Kenyatta.
Dhacdooyinka 2026 ma ahan markii ugu horreysay ee mas’uuliyiin Soomaali ah lagu celiyo ama loo diido gelitaanka Kenya.
Sanadkii 2019, waxaa Garoonka Jomo Kenyatta laga celiyay saddex mas’uul Soomaali ah oo kala ahaa Wasiir-ku-xigeenkii Wasaaradda Biyaha iyo Tamarta Cismaan Liibaan, iyo Senatorro kala ahaa Ilyaas Cali Xasan iyo Zamzam Daahir.
Wararka xilligaas laga qoray ayaa sheegay in mas’uuliyiinta loo diiday gelitaanka Kenya sababo la xiriiray shuruudaha fiisaha, inkastoo ay wateen baasaboorrada diblomaasiga ah.
Saddexda mas’uul ayaa markii dambe dib ugu laabtay Soomaaliya. Dhacdadaasi waxay xilligaas kusoo beegantay xilli xiriirka Soomaaliya iyo Kenya uu ahaa mid xasaasi ah.
Dib u soo noqoshada dhacdooyinka noocan ah ayaa sare u qaaday su’aalo ku saabsan xaaladda xiriirka Soomaaliya iyo Kenya.
Labada dal waxaa ka dhexeeya xiriir muhiim ah oo dhinacyada ganacsiga, amniga, siyaasadda iyo socdaalka ah. Kenya waxay sidoo kale hoy u tahay bulsho Soomaaliyeed oo tiro badan, waxaana Nairobi muddo dheer ahayd xarun muhiim u ah ganacsatada iyo siyaasiyiinta Soomaaliyeed.
Dhinaca Soomaaliya waxaa hadda la sugayaa faahfaahin dheeraad ah oo ku saabsan dhacdada Yuusuf Kabaale.
Haddii xildhibaanka laga celiyay dalka iyadoo uusan jirin wax dukumenti ah oo khaldan, waxaa suuragal ah in dowladda Soomaaliya ay Nairobi ka dalbato sharaxaad rasmi ah.
Haddii se arrintu la xiriirto dukumentiyada socdaalka ama shuruudaha gelitaanka Kenya, waxaa la filan karaa in labada dowladood ay arrinta ku xalliyaan waddo diblomaasiyadeed.
