Xog cusub oo laga helayo xaaladda siyaasadeed iyo amni ee Koonfur Galbeed ayaa sheegaysa inXasan Sheekh Maxamuud uu xalay xiriir la sameeyay Hoggaamiyaha Koonfur Galbeed Sheekh Aadan Maxamed Nuur (Aadan Madoobe), isagoo lagu wargeliyay inuu si degdeg ah ugu laabto magaalada Baydhabo.
Sida xogta la helayo ay tilmaamayso, tallaabadan ayaa la xiriirta xaaladda amni ee magaalada iyo dhaqdhaqaaqyada ciidamada daacadda u ah madaxweynihii hore ee Koonfur Galbeed, Cabdicasiis Xasan Maxamed Laftagareen.
illaa hadda ma jiro bayaan rasmi ah oo ka soo baxay Madaxtooyada Soomaaliya ama xafiiska Aadan Madoobe oo xaqiijinaya wada-hadalkaas.
Magaalada Baydhabo ayaa maalmihii lasoo dhaafay noqotay goob ay isku hayaan dhinacyo siyaasadeed iyo ciidan, iyadoo ciidamada dowladda Federaalka iyo kuwa taageersan hoggaanka Aadan Madoobe ay la kulmeen dhaqdhaqaaqyo militari oo ay wadaan ciidamo taageersan Laftagareen.
17-kii Agoosto ayaa ciidamo taabacsan Laftagareen waxaa ay weerar ku qaadeen Baydhabo, iyadoo dagaal uu ka dhacay gudaha iyo bannaanka magaalada. Weerarkaas ciidamadii Laftagareen ay markii dambe dib uga baxeen qaybo ka mid ah magaalada, inkastoo dhinacyo kale ay sheegteen inay gacanta ku hayaan magaalada.
Waxay salka ku haysaa khilaaf siyaasadeed oo muddo socday oo ku saabsan hoggaanka Koonfur Galbeed, doorashada iyo cidda sharci ahaan hoggaaminaysa maamulka.
Aadan Madoobe ayaa hoggaanka Koonfur Galbeed qabtay bartamihii 2026, iyadoo Dowladda Federaalka ay taageertay isbeddelka siyaasadeed ee ka dhacay maamulka.
Laftagareen iyo taageerayaashiisa ayaa dhinaca kale ku adkeysanaya in hoggaanka cusub uusan ku imaan hannaan ay iyagu aqoonsan yihiin, taasoo sababtay in khilaafkii siyaasadeed uu si tartiib ah ugu milmo dhinaca amniga.
Ciidamada taageersan Laftagareen ayaa waxay dhaqdhaqaaqyo ka wadaan duleedka Baydhabo, iyadoo laga cabsi qabay in khilaafka siyaasadeed uu isu beddelo dagaal furan.
Joogitaanka Aadan Madoobe wuxuu noqon karaa fariin siyaasadeed oo muujinaysa in dowladda dhexe ay weli garab taagan tahay maamulka uu hoggaamiyo.
Dhanka kale, waxaa laga yaabaa in dowladda ay doonayso in hoggaanka maamulka uu si toos ah uga qeyb qaato abaabulka ciidamada iyo dadaallada lagu sugayo amniga magaalada.
Laakiin haddii xaaladdu sii xumaato, joogitaanka hoggaamiyaha gudaha magaalada wuxuu sidoo kale kordhin karaa khatarta siyaasadeed iyo tan amni.
Hoggaamiyaha Koonfur Galbeed ayaa wajahaya tijaabo siyaasadeed iyo mid amni oo culus.
Dhinac wuxuu haystaa taageerada Dowladda Federaalka iyo ciidamada dowladda ee ku sugan magaalada iyo nawaaxigeeda.
Dhinaca kale, ciidamada taageersan Laftagareen ayaa weli muujinaya awood ay ku cadaadin karaan magaalada.
Warbixinno dhowaan soo baxay ayaa tilmaamaya in Aadan Madoobe uu horey u muujiyay walaac ku saabsan ciidamada ka soo horjeeda maamulka, taasoo muujinaysa in khatarta amni ay ahayd arrin ay maamulkaasi horey u dareemayeen.
Cabdicasiis Laftagareen ayaa weli ah shaqsiga ugu weyn ee dhinaca kale ee khilaafka.
Taageerayaashiisa ayaa ku dooday in isbeddelka hoggaanka Koonfur Galbeed uusan ahayn mid sharciyad ku filan leh, halka dowladda Federaalka ay taageerayso hoggaanka Aadan Madoobe.
Ciidamada la safan Laftagareen ayaa marar kala duwan isku dayay inay cadaadis ku saaraan maamulka cusub, waxaana maalmahan la soo wariyay dagaallo iyo dhaqdhaqaaqyo militari oo ka dhacay Baydhabo.
Dhibaatada ugu weyn ee ka dhalan karta xiisadda waa shacabka Baydhabo.
Marka khilaaf siyaasadeed uu isu beddelo dagaal ciidan, waxaa si toos ah u saameynaya dadka rayidka ah, ganacsiga, isku socodka iyo adeegyada bulshada.
Dowladda Federaalka ayaa si weyn loogu xiraa isbeddelka hoggaanka Koonfur Galbeed, sidaas darteed wixii ka dhaca magaalada waxaa si toos ah loogu fasiran karaa siyaasadda Villa Soomaaliya.
Haddii Aadan Madoobe uu si buuxda u xakameeyo Baydhabo, waxay u noqon kartaa guul siyaasadeed oo dowladda Federaalka ah.
Haddii ciidamada Laftagareen ay sii wadaan inay gudaha u galaan magaalada ama ay awood u yeeshaan inay maamulka cadaadiyaan, waxaa sii adkaan kara xaaladda siyaasadeed ee dowladda dhexe.
Aadan Madoobe ma ku laaban doonaa Baydhabo, mise wuxuu sii joogi doonaa meel ka baxsan magaalada?
Dhanka kale, ciidamada Laftagareen ayaa weli ah qodobka ugu weyn ee amni ee dowladda iyo maamulka cusub ay wajahaan.
Inkasta oo dhinacyadu awood ciidan isku muujinayaan, haddana khilaafka Koonfur Galbeed wuxuu asal ahaan leeyahay dhinac siyaasadeed.
